சிக்கலில் சிறிய வங்கிகள்..! – முதலீட்டாளர்கள் என்ன செய்ய வேண்டும்?

அனைவரும் விரும்பும் துறை

பொதுவாக, முதலீட்டாளர்களுக்குப் பிடித்தமான துறைகளில் ஒன்று வங்கித்துறை. காரணம், மற்ற எல்லாத் துறைகளையும்விட வங்கித்துறையை சாதாரண முதலீட்டாளர்களாலும் எளிதில் புரிந்துகொள்ள முடியும். தவிர, அனைவருக்கும் வங்கி சார்ந்த தேவைகள் எப்போதும் இருந்துகொண்டே இருக்கின்றன. கல்விக் கடன், விவசாயக் கடன், நகைக் கடன், தொழில் கடன், ஃபிக்ஸட் டெபாசிட், ரெக்கரிங் டெபாசிட், மாதச் சம்பளம், பென்ஷன், இவை தவிர நிதி சார்ந்த சேவைகள் என வங்கியைப் பயன்படுத்துபவர்களின் எண்ணிக்கை உயர்ந்துகொண்டே வருகிறது. பெருவாரியான மக்கள் வங்கி என்ற அமைப்புக்குள் வருகிற வரை சேவைக்கு முக்கியத்துவம் தரப்பட்டதால், வருமானம் அல்லது லாபம் பற்றி வங்கிகள் பெரியளவில் நினைத்துப் பார்க்கவில்லை. ஆனால், தாராளமய மாக்கலுக்குப் பின் தனியார் வங்கிகள் வந்த பின், கட்டணத்துடன்கூடிய நல்ல சேவை அறிமுகமாக, பொதுத்துறை வங்கிகளும் கணிசமான லாபம் ஈட்டத் தொடங்கின. இதனால் வங்கிப் பங்குகள் நல்ல லாபம் தந்தன.

வங்கிகளின் லாபம் அதிகரித்த அதே நேரத்தில், வாராக்கடன், முறைகேடு போன்ற பிரச்னைகளும் அதிகரிக்கவே செய்துள்ளன. இந்த இரு பிரச்னைகளும் பொதுத்துறை வங்கிகளில் கொஞ்சம் அதிகம். தவிர, லாபமும் குறைவு. இதனால்தான், பொதுத்துறை வங்கிகளைவிட தனியார் வங்கிகளையே முதலீட்டாளர்கள் அதிகம் விரும்புகின்றனர். அவற்றிலும் எல்லா தனியார் வங்கிகளையும் முதலீட்டாளர்கள் விரும்புகின்றனர் என்று சொல்ல முடியாது. இந்தியாவில் பட்டியலிடப்பட்ட 21 தனியார் வங்கிகள் உள்ளன. ஆனால், இதில் சில வங்கிகள் முதலீட்டாளர்களின் சொத்து மதிப்பை பெருமளவுக்குக் கரைத்துவிட்டன.

தனியார் வங்கிகளின் சந்தை மதிப்பில் முதலிடத்தில் ஹெச்.டி.எஃப்.சி வங்கி இருக்கிறது. இதன் சந்தை மதிப்பு ரூ.6.3 லட்சம் கோடி. தனியார் வங்கிகளின் பட்டியலில் கடைசி இடத்தில் இருக்கும் தனலட்சுமி வங்கியின் சந்தை மதிப்பு சுமார் 300 கோடி மட்டுமே. ரூ.5,000 கோடிக்கும் கீழான சந்தை மதிப்பில் எட்டு தனியார் வங்கிகள் உள்ளன. இந்த வங்கிகளில் எத்தனை இன்னும் ஐந்து அல்லது 10 ஆண்டுகளில் தப்பிப் பிழைக்கும் என்பதைப் பொறுத்திருந்துதான் பார்க்க முடியும்.

கோவிட் ஏற்படுத்திய பாதிப்பு..!

தனியார் வங்கிகள், அதிலும் குறிப்பாக சிறிய வங்கிகளின் சிக்கலுக்கு என்ன காரணம் என ஈக்னாமிக்ஸ் நிறுவனத்தின் ஜி.சொக்கலிங் கத்திடம் கேட்டோம்.

‘‘கடந்த ஆண்டு யெஸ் பேங்க் மற்றும் டி.ஹெச்.எஃப்.எல் உள்ளிட்ட நிதி சார்ந்த அமைப்புகளில் சிக்கல் ஏற்பட்டது. இதைத் தொடர்ந்து வங்கிகள்மீது முதலீட்டாளர்கள் மட்டுமல்லாமல் டெபாசிட்தாரர்களின் நம்பிக்கையும் குறைந்தது. இதனால் வங்கிகளின் டெபாசிட் வளர்ச்சி குறைந்தது.

இந்த நிலையில், கோவிட் குறித்த தகவல்கள் வெளியாகின. இதனால் வங்கிகளில் கடன் வாங்கியவர்கள் மறுசீரமைப்பு செய்யும் பணியைச் செய்தனர். ஏற்கெனவே வங்கிகளில் வாராக்கடன் அதிகரித்து வந்த சூழலில் மேலும் வாராக்கடன் அதிகரித்தது. இந்த அனைத்துக் காரணங்களால் வங்கித் துறையில் முதலீட்டாளர்கள் மற்றும் டெபாசிட்தாரர் களுக்கு ஏற்பட்ட அச்சம் காரணமாக வங்கித் துறை பங்குகள் சரிந்தன.

சிறிய தனியார் வங்கிகள் மட்டுமல்லாமல் நடுத்தரத் தனியார் வங்கிகளும் சரிவை சந்தித்தன. ஓரிரு தனியார் வங்கிகளைத் தவிர, மற்ற வங்கிகளில் பெரிய பிரச்னை இல்லை. தனியார் வங்கிகள் கடந்த காலங்களில் பல சிக்கல்களைக் கடந்து வந்துள்ளன. தவிர. இது ஒரு சுழற்சி (Cycle) என்றே சொல்ல வேண்டும். குறிப்பிட்ட ஆண்டு காலத்துக்கு ஒருமுறை இப்படி நடப்பதைத் தவிர்க்க முடியாது. இன்னும் சில ஆண்டுகளுக்குப் பிறகு, இந்த வங்கிகளின் நிலைமை மாறும்.